БАЛАНД БАРДОШТАНИ ИҚТИДОРИ ТАШКИЛОТҲОИ ҶАМЪИЯТӢ ДАР ВАСЕЪ НАМУДАНИ ФАРОГИРИИ АҲОЛӢ БО МАШВАРАТИ ТОТЕСТӢ ВА ТАШХИСИ ВНМО

7-8 июни соли 2018 дар шаҳри Хуҷанд ҷаласаи кории навбатии ташкилотҳои ҷамъиятие, ки хизматрасонии машварти тотестӣ ва ташхиси ВНМОро  барои гурӯҳҳои осебпазири аҳолии Ҷумҳурии Тоҷикистон мерасонанд, баргузор мегардад.

Дар рӯзи аввали ҷаласа маълумот доир ба чорабиниҳои асосии Барнома оид ба муқовимат бо эпидемияи вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон дар давраи солҳои 2017-2020 ва дастовардҳо дар татбиқи нуқтаҳои машварати тотестӣ ва ташхиси ВНМО дар Тоҷикистон пешкаш карда мешавад.

Дар рӯзи дуюм машқҳои гурӯҳӣ  ва инфиродӣ барои омӯзиш ва коркарди малакаҳои амалӣ дар ташкили машварати тотестӣ ва ташхиси фаврии ВНМО пешбинӣ карда шудаанд. Мутахассисони Маркази Ҷумҳуриявии пешгирӣ ва мубориза бар зидди бемории СПИД кормандони ташкилотҳои ҷамъиятиро бо механизми табодули иттилоот ва идоракунии табобати мизоҷони мубталои ВНМО, ки дар якҷоягӣ бо ташкилотҳои ҷамъиятӣ ва марказҳои СПИД дарёфт карда шудаанд, шинос менамоянд.

Чорабинии мазкур аз ҷониби Ташкилоти ҷамъиятии ҷумҳуриявӣ «AFEW-Тоҷикистон» дар ҳамкорӣ бо Муассисаи давлатии «Маркази Ҷумҳуриявии пешгирӣ ва мубориза бар зидди бемории СПИД» ВТҲИА ҶТ дар доираи лоиҳаи «Коҳиши норасоӣ: тандурустӣ ва ҳуқуқҳои гурӯҳҳои осебпазири аҳолӣ-2.0», ки аз ҷониби Вазорати корҳои хориҷии Нидерландия маблағгузорӣ карда мешавад, ташкил карда мешавад.

• Қаблӣ
• Баъдӣ