Дар Душанбе доир ба натиҷаҳои лоиҳаи “Мо зери як офтобем” мизи гирд баргузор шуд

10 марти соли 2023 дар шаҳри Душанбе мизи мудаввар баргузор гардид, ки дар он натиҷаҳои лоиҳаи «Мо зери як офтобем», ки аз ҷониби ширкати фармасевтии амрикоии Gilead Sciences Inc маблағгузорӣ мешавад, баррасӣ шуд. Дар чорабинӣ намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Кумитаи миллии ҳамоҳангсозӣ оид ба мубориза бо СПИД, сил ва вараҷа дар Ҷумҳурии Тоҷикистон, мутахассисони ташкилотҳои ҷамъиятӣ ва байналмилалӣ, инчунин кормандони ВАО иштирок намуданд.

Дар рафти вохӯрӣ натиҷаҳои асосии фаъолияти лоиҳа ва натиҷаҳои маъракаи иттилоотӣ, ки дар доираи лоиҳаи мазкур гузаронида шудаанд, баррасӣ гардид. Инчунин оид ба татбиқи дастури “Роҳнамо оид ба таъмини муносибати маҷмӯии байнисоҳавӣ дар рафти хизматрасониҳои тиббӣ ба шахсони бо ВНМО зиндагикунанда дар шароити пандемияи COVID-19”, ки аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тасдиқ гардидааст, мубодилаи афкори муфид ба амал омад.

Лоиҳаи «Мо зери як офтобем» аз 11 апрели соли 2022 то 11 апрели соли 2023 аз ҷониби Ташкилоти ҷамъиятии ҷумҳуриявии «Афиф» дар ҳамкорӣ бо марказҳои мубориза ва пешгирии бемории ВНМО, ташкилотҳои ҷамъиятӣ ва кормандони ВАО амалӣ мегардад. Ҳадафи лоиҳа фароҳам овардани муҳити мусоиди иҷтимоии бидуни табъиз барои таъмини дастрасии умумӣ ба пешгирӣ, табобат, нигоҳубин ва дастгирӣ нисбат ба ВНМО мебошад.

• Қаблӣ
• Баъдӣ