Кормандони иҷтимоӣ ва аутрич дар Хатлон малакаҳои кӯмаки иҷтимоии худро ҳангоми бемории сил такмил медиҳанд

3-4 ва 10-11 феврали соли 2022 дар шаҳри Бохтар Ташкилоти ҷамъиятии ҷумҳуриявии «Афиф» барои кормандони иҷтимоӣ ва аутрич дар вилояти Хатлон ду тренинг дар мавзӯъҳои «Дастгирии иҷтимоии бемории сил» ва «Сил, пешгирӣ, дарёфт, табобат, нигоҳубин ва дастгирӣ» баргузор намуд. Чорабинӣ дар доираи лоиҳаи «Пурзӯркунии шароити мусоид ва васеъ намудани миқёси чорабиниҳои профилактикӣ ва табобатӣ барои коҳиш додани сатҳи сирояти ВНМО ва бемории сил дар Ҷумҳурии Тоҷикистон», бо дастгирии молиявии Барномаи рушди СММ-Тоҷикистон сурат гирифт, ки мақсади асосии он омӯзонидани кормандони аутрич ва иҷтимоии лоиҳа оид ба дарёфти фаъолонаи ҳама шаклҳои бемории сил ва такмил додани малакаҳои расонидани дастгирӣ дар доираи барномаи кӯмаки иҷтимоии ҳангоми бемории сил мебошад.

Дар тренингҳо мутахассиси Барномаи БРСММ-Тоҷикистон Сайёра Зиёева, директори Маркази ҳифзи аҳолӣ аз бемории сил дар шаҳри Бохтар Саидаҳмад Раҷабов ва менеҷери лоиҳаи ТҶҶ «Афиф» Саодат Орипова ба иштирокчиён оид ба масъалаҳои асосии роҳҳои интиқол ва пешгирии бемории сил, вазъи бемории сил ва сили ба дорувор устувор дар кишвар, модулҳо ва алгоритмҳои нави дарёфт кардани бемории сил, усули ба бемор нигаронидашуда, усулҳои дастгирии равонию иҷтимоӣ барои бемори сил, ҷалби мизоҷон ба барнома ва беҳтар намудани дастрасӣ ба хизматрасонӣ барои одамони гирифтори бемории сил маълумот доданд.

• Қаблӣ
• Баъдӣ