Оиди равоншиносӣ

Салом Сӯҳроб
Дар аввал ором шавед. Чаро шумо ба чунин хулоса меоед, ки ба ягон беморӣ гирифтор шудед. Агар аз ташхис гузашта бошед ва духтурон шуморо дида бошанд,  пас шумо дар ҳақиқат солим ҳастед.
Агар тез- тез чунин саволҳо ба саратон ояд, пас ба худ савол диҳед:
Оё ман ба ягон кори ношоям даст мезанам? Чаро чунин фикрҳо ба сарам меояд? Шояд асабҳоям ноором шудаанд? Ва ҳаракат кунед, то ба худатон барои ин саволҳо ҷавоби муфассали шахсӣ диҳед.
Ман мехостам фаҳмам, ки чаро шумо хавотир шудед? Шумо дар ташвиш ҳастед, ки бо зарфҳои хӯрокхӯрӣ метавонед гирифтори ВНМО, ё Гепатитҳо шавед? Барои чӣ ба чунин хулоса омадед? Шумо ягон ашёи хӯрокхӯриро хунолуд дидед ва ё он тамизнаёфта буд?
Шумо ба категорияи шахсоне дохил мешавед, ки ҳама чизро сахт ба дил мегиранду боиси ҳамин чиз зиёд ғам мехуранд. Гарчанд ягон асосу далел нест. Чунки вирус дар пиелаву  қошуқ нест. Тасаввур кунем, ки пеш аз шумо шахси сироятёфта аз ин косаву табақ хурок хӯрда буд, пас  дар он вирус нест, чунки вирус танҳо дар хун, нутфа, тарашуҳоти маҳбал  мебошад ва боз пас аз шустани ашёҳои хӯрокхӯрӣ он пурра тоза мешавад. Инчунин вирус дар ҳавои кушод зуд нест мешавад.
Агар лабатон кафида бошаду, шумо аз зарфи хунолуд мехӯрдед, дар ин ҳолат эҳтимолияти гирифтори сироят ёфтан мешудед. Хушбахтона, ки чунин набуд.
Дар бораи ВНМО чиро донистан муҳим аст?
ВНМО - ин вируси норасоии масунияти одам буда, ҳангоми ворид шудан ба организм, системаи худмуҳофизатии (иммунии) шахсро, ки организмро аз ҳар гуна бемориҳо муҳофизат мекунад, хароб менамояд.
Бемориҳои ВНМО се роҳи гузариш дорад: ҳангоми алоқаи ҷинсӣ; ба воситаи хуни сироятёфта; аз модар ба кӯдак (дар вақти ҳомиладорӣ, таваллуд ва ширмаконӣ).
ВНМО бо дигар роҳҳо намегузарад, аз ҷумла: ҳангоми  истифода бурдани зарфҳои умумӣ, ҳангоми бӯса намудан, ҳангоми якҷоя хӯрок хӯрдан, ҳангоми сӯҳбат намудан, ҳангоми дастфишурдан ва ба оғӯш гирифтан, ҳангоми сулфа , атса задан, ашк ва арақи бадан.
Сӯҳроб, агар ба ягон кори ношоями тасодуфӣ даст зада бошед, пас бояд пас аз 3 моҳ аз ташхиси ВНМО гузаред.
Пешгирии ВНМО: истифодаи асбобҳои яккаратаи тиббӣ (стоматологӣ). Танҳо асбобҳои гигиении шахсии худро истифода баред (қайчиҳои маникюр), асбобҳои риштарошӣ. Агар пайхас баред, ки хатари сироятёбӣ доред, пас аз санҷиши ВНМО гузаред. Метавонед ройгон тести оҷилии даҳонӣ барои санҷиши ВНМО фармоиш диҳед дар сомонаи www.hivtest.tj
Суҳроб, барои маълумоти бештару муфассал метавонед ба табиби сироятшиноси ҳамин шабака муроҷиат намоед. Он кас бароятон маълумоти кофӣ оид ба ВНМО ва Гепатитҳо мерасонанд.
Пас,  барои дар дил оромӣ доштан ҳаракат кунед ки тарзи ҳаёти солимонаро баред. То ки дар дил ҳар гуна фикрҳои  манфӣ ба саратон наояд. Пас, пеш аз ҳама ба оилаи худ содиқу вафодор монед.
Ман албатта ба пуррагӣ вазъияти шуморо намедонам, пас ин маълумотҳои умумӣ барои бартараф намудани фикрҳои манфӣ.
Сӯҳроб, агар боз саволҳо дошта бошед, пас ман дар хати алоқа.
Бо эҳтиром Ризвона