Оиди масъалаҳои ҳуқукӣ

Ассалом. Дар моддаи 81 Кодекси оилаи ҶТ вобаста ба масъалаи мазкур гуфта шудааст. Мувофиқи қисми 1 моддаи мазкур, ҳангоми мавҷуд набудани созишнома дар хусуси пардохти алимент барои фарзандони ноболиғ суд аз падару модари онҳо ҳар моҳ ба андозаи зерин алимент мерӯёнанд. Барои як фарзанд чоряк (25%), барои ду фарзанд сеяк (33%), барои се фарзанд ва зиёда  аз он - нисфи (50%) музди меҳнат ва даромади дигари падару модар.

Мувофиқи қисми 1 моддаи 83 Кодекси мазкур, ҳангоми набудани созишномаи падару модар дар хусуси пардохти алимент ба кӯдакони ноболиғ ва дар ҳолате, ки агар падар ё модари алиментдиҳанда музди кор ва ё даромади дигари номунтазам ё тағьирёбанда дошта бошад, ё агар ин падар ё модар музди меҳнату даромади дигарро пурра ё қисман дар шакли асл (натура) ё асъори хориҷӣ гирад, инчунин ҳангоми нагирифтани музди меҳнат ва (ё) даромади дигар, инчунин дар ҳолатҳои дигаре, ки ситонидани алимент вобаста аз ҳиссаи музди меҳнат ва даромади дигари падар ё модар имконнопазир, мушкил ё манфиати яке аз тарафҳоро моҳиятан халалдор созад, суд метавонад андозаи алименти ҳармоҳа ситонидашавандаро ба маблағи устувор ва ё ҳамзамон дар шакли ҳисса ва бо маблағи устувор муайян намояд.